बुद्धं सरणं म्हणा म्हणा रे

पंचशीला त्रिशरण हि तत्त्वे दिधली या बहुजना
बुद्धं सरणं म्हणा म्हणा रे, बुद्धं सरणं म्हणा
बुद्धं सरणं गच्छामि
धम्मं सरणं गच्छामि
संघं सरणं गच्छामि

पंचशीलाची पंचतत्त्वे हि मार्ग दाविती भला
सत्य अहिंसा आणि शांतीच्या छायेत राहू चला
खोटे बोलणे चोरी करणे छंद नसे चांगला
सकलासाठी तथागताने हा उपदेश दिला
     कुणीही यावे पावन व्हावे निर्मळ करुनी मना
     बुद्धं सरणं म्हणा म्हणा रे, बुद्धं सरणं म्हणा

भेदभावाची चिता पेटवून समतेने नांदूया
हितकारक ही तत्त्वे सारी आचरणी आणूया
त्यजूनी वाईट व्यसने आपण सौख्याला साधूया
आदर्शाचे जीवन अपुले जगताला दावूया
     उच्च असो की नीच असो हा दोष न द्यावा कुणा
     बुद्धं सरणं म्हणा म्हणा रे, बुद्धं सरणं म्हणा

समानता अन मानवताही श्रद्धेने आचरा
दुःखी जीवांचे दुःख हरावे मर्म हे ध्यानी धरा
नीती शील अन प्रज्ञा करुणा नेमाने अनुसरा
बुद्धाची ही शिकवण तुम्हा पालन याचे करा
     माणूस म्हणुनी जगण्यासाठी हीच दिली प्रेरणा
     बुद्धं सरणं म्हणा म्हणा रे, बुद्धं सरणं म्हणा

गौतम बुद्धाचा संदेश सांगू चला रे

नमो तस्स भगवतो अरहतो सम्मासम्-बुध्दस्स

गौतम बुद्धाचा, बुद्धाचा संदेश सांगू चला रे
बोध ज्ञानाचा, ज्ञानाचा देऊ चला रे

दुःख पापे जिथे, ऐसा नदीचा किनारा
मोह माया जिथे, ऐसा हा जीवन पसारा
शुद्ध देहाच्या क्षमतेची धारा
प्रज्ञा करुणेच्या ममतेची धारा
विश्व शांतीच्या समतेची धारा
     बोध सत्याचा, सत्याचा घेऊ चला रे
     गौतम बुद्धाचा, बुद्धाचा संदेश सांगू चला रे

क्रोध युद्धातूनी काही जगी ना उरावे
बंधू प्रेमातूनी सारे हे जीवन तरावे
पंचशीलाच्या शब्दाची गाथा
बोध शुद्धीच्या तत्त्वाची गाथा
बौद्ध धम्माच्या संघाची गाथा
     दिव्य मार्गाने, मार्गाने जाऊ चला रे
     गौतम बुद्धाचा, बुद्धाचा संदेश सांगू चला रे

जीव त्यागातले श्रद्धेने विश्वात तरती
अहं ईर्षातले पापाच्या खाईत बुडती
हितशत्रुला प्रेमाने जिंका
लोभ मोहाला त्यागाने जिंका
द्वेष क्रोधा संयमाने जिंका
     महिमा धम्माचा, धम्माचा गाऊ चला रे
     गौतम बुद्धाचा, बुद्धाचा संदेश सांगू चला रे

बलिदानाचे कफन बांधुनी

बलिदानाचे कफन बांधुनी झिजला तू भीमराया

मायपित्याहून उदंड केलीस अमुच्यावरती माया

अन्यायाची चीड घेऊनी पेटवली तू धूळ

धुळीतून त्या तयार झाले लाख लाख हे लाल

अन्यायाच्या पुढे कधी ना झुकेल त्याची छाया

     बलिदानाचे कफन बांधुनी झिजला तू भीमराया 

लाख जीवांच्या धगधगणाऱ्या घेऊन सवे मशाली

जुन्या रूढींशी मांडलीस तू जन्ममृत्यूची खेळी

लाचारीतून दलितांची ना जगेल आता काया

     बलिदानाचे कफन बांधुनी झिजला तू भीमराया

बहुजन हिताय बहुजन सुखाय तू सम्यक दृष्टीचा

तथागतांचा अनुयायी तू पुत्र जरी क्रांतीचा

येशील का रे पुन्हा कधी तू आम्हास दर्शन द्याया

     बलिदानाचे कफन बांधुनी झिजला तू भीमराया  

दलितांच्या दीपा प्रणाम तुज विश्वाचे

तू अमर तेज तव अखंड सामर्थ्याचे
दलितांच्या दीपा प्रणाम तुज विश्वाचे

तू होऊनि जीवन पतितांचे विश्रामा
चिखलात फुलविली सहस्त्र कमळे भीमा
सर्वस्व वाहुनी दलितांच्या उद्धारा
तू पावन तेजा उज्ज्वल केले नामा
तू जीवन दिधले मातीला गंधाचे
दलितांच्या दीपा प्रणाम तुज विश्वाचे

सत्याग्रह करुनी जागविले जग सारे
चवदार तळ्याची उघडी केली दारे
नित जागृत राहुनी न्याय दिला दलितांना
झुंजला तयास्तव गिळूनि द्वेष निखारे
घन तमी उजळिले लक्ष दीप ज्ञानाचे
दलितांच्या दीपा प्रणाम तुज विश्वाचे

तू अमर तेज तव अखंड सामर्थ्याचे
दलितांच्या दीपा प्रणाम तुज विश्वाचे

भारतीय घटनेचा तू शिल्पकार आहे

भारतीय घटनेचा तू शिल्पकार आहे
सुगंधापरी तव किर्ती दिगंतात वाहे

भक्तिभाव श्रद्धासुमने तुला अर्पिताना
कंठ दाटूनी ये अमुचा पूर लोचनांना
तुझी स्मृती अंतःकरणी दुःख कोरताहे
सुगंधापरी तव किर्ती दिगंतात वाहे

शूद्र म्हणुनी जे जे मानव हीन लेखलेले
तमातून काढून त्या तू प्रकाशित केले
कोटी कोटी जनतेचा तू मार्गदीप आहे
सुगंधापरी तव किर्ती दिगंतात वाहे

चंदनापरी तू झिजूनी कष्ट सोसलेस
ज्ञानसूर्य तूचि अमुचा तूच बोधिवृक्ष
तुझी कथा इतिहासाला साक्षीभूत आहे
सुगंधापरी तव किर्ती दिगंतात वाहे

भारतीय घटनेचा तू शिल्पकार आहे
सुगंधापरी तव किर्ती दिगंतात वाहे

भीमा उजळलास अंधार

शतका शतका मधून होतो अपूर्व साक्षात्कार
नव स्वतंत्र भारतात भीमा उजळलास अंधार

करिते रूढी मानवतेचा जेव्हा स्वाहाकार
माणूस म्हणुनी जगण्यासाठी मिळवी फक्त नकार
समानतेचा हवा कायदा
दृष्टी तुझी उदार
नव स्वतंत्र भारतात भीमा उजळलास अंधार

तुझीच प्रतिमा पूजीत असता उमटतात हुंकार
संधी साधून दलित बंधूचा घडविलास उद्धार
जनतेसाठी कष्टलास तू
करुणा तुझी अपार
नव स्वतंत्र भारतात भीमा उजळलास अंधार

शतका शतका मधून होतो अपूर्व साक्षात्कार
नव स्वतंत्र भारतात भीमा उजळलास अंधार

वैर जिंकावं प्रेमानं युद्धानं वाढते युद्ध

वैर जिंकावं प्रेमानं युद्धानं वाढते युद्ध
शाक्य कोलिया संघर्षी ते वदले गौतम बुद्ध

नदी रोहिणी पाण्यासाठी वाद तो शाक्यांचा
संघ घेई मग बहुमतांनी निर्णय युद्धाचा
हिंसाकारक त्यांच्या मतांना गौतम करी विरोध
     शाक्य कोलिया संघर्षी ते वदले गौतम बुद्ध

संघाचा तो नियम मोडता भोगी स्वतः शिक्षा
वचनासाठी घेती शांतीने परिव्रज्या दीक्षा
सर्व सुखाचा त्याग करुनी सत्य केले सिद्ध
     शाक्य कोलिया संघर्षी ते वदले गौतम बुद्ध

मानव दुःख हराया केली घोर तपस्यां वनी
ज्ञानसूर्य हा देई जगाला धम्म खरा जीवनी
सत्य अहिंसा आणि शांतीचा करुनिया बोध
     शाक्य कोलिया संघर्षी ते वदले गौतम बुद्ध

वैर जिंकावं प्रेमानं युद्धानं वाढते युद्ध
शाक्य कोलिया संघर्षी ते वदले गौतम बुद्ध

नमस्कार घ्यावा, अहो बुद्ध देवा

नमस्कार घ्यावा, अहो बुद्ध देवा
घुमे प्रार्थना, अंतरी दीप लावा

हरा दुःख भ्रांती, तुम्ही दिव्य शांती
दिला या जगा, मंत्र कारुण्य सेवा

नसे भेद काही, आता खेद नाही
असा लाभला, थोर आनंद ठेवा

मने शुद्ध जेथे, वसे बुद्ध तेथे
नुरो या जगी, क्रूरता द्वेष हेवा

नमो शुद्ध रूपा, नमो आत्मदीपा
तमातून या मानवा मार्ग दावा